Ólína ráðin skólastjóri í Þorlákshöfn

Gengið var frá ráðningu Ólínu Þorleifsdóttur í stöðu skólastjóra Grunnskólans í Þorlákshöfn í dag á fyrsta fundi nýrrar bæjarstjórnar.

Ólína býr yfir mikilli reynslu á sviði menntamála og starfaði hún sem kennari við grunnskólann frá 1998 til 2010 en þá var hún ráðin sem aðstoðarskólastjóri við Kópavogsskóla. Þar vann hún til 2014 en þá kom hún aftur „heim“ og hóf störf hjá Skóla- og velferðarþjónustu Árnesinga. Þar var hún til ársins 2016 en þá tók hún við aðstoðarskólastjórastöðunni af Jóni Sigurmundssyni.

Ólína hefur lokið B.Ed námi í kennslufræðum, M.ed í menntunarfræði með áherslu á stjórnun og diplómu í sérkennslufræðum.

Ólína tekur við starfinu af Guðrúnu Jóhannsdóttur sem sagði starfi sínu lausu í vor eftir þrjú ár í starfi.

Ólína býr í Þorlákshöfn ásamt manni sínum, Jóni Páli Kristóferssyni, og þremur dætrum.

Fyrri greinLögregla lagði hald á 200 kríuegg
Næsta greinStúlka brotnaði á báðum höndum