Áfram Árborg, Miðflokkurinn, Framsókn og óháðir og Samfylkingin hafa náð saman um meirihlutasamstarf flokkanna í Árborg og verður málefnasamningur flokkanna kynntur á fundi í Húsinu á Eyrarbakka í fyrramálið.
Þetta kemur fram í tilkynningu frá framboðunum sem send var út í kvöld.
Þegar framboðin kynntu viðræður um meirihlutasamstarf um síðustu helgi sögðu þau úrslit kosninganna sýna að kjósendur í Sveitarfélaginu Árborg hafi hafnað áframhaldandi meirihluta Sjálfstæðisflokksins. Eðlilegt væri að reynt yrði að mynda nýjan meirihluta án aðkomu Sjálfstæðisflokks.
D-listinn fékk 38,3% atkvæða í kosningunum og fjóra bæjarfulltrúa, tapaði einum. Fylgi D-listans minnkaði um tæp 13% frá kosningunum 2014. Samfylkingin fékk 20% atkvæða og hélt sínum tveimur fulltrúum, Framsókn og óháðir héldu sömuleiðis sínum eina fulltrúa með 15,5% atkvæða. Miðflokkurinn fékk 10,7% atkvæða og einn fulltrúa og Áfram Árborg fékk 8,5% og einn fulltrúa.