Öryggismyndavélar beintengdar við varðstofu á Selfossi

Leturstærð: Decrease font Enlarge font
image Ágúst Sigurðsson sveitarstjóri Rangárþings ytra og Oddur Árnason yfirlögregluþjónn undir myndavélamastri við Ytri-Rangá. Ljósmynd/Oddur Árnason

Að undanförnu hefur verið unnið að uppsetningu öryggismyndavéla á Suðurlandi sem tengdar eru beinlínutengingu við varðstofu á lögreglustöðinni á Selfossi, þar sem sólarhrings vakt er staðin.

Neyðarlínan og lögreglan hafa átt samstarf við ýmis sveitarfélög á Suðurlandi um uppsetningu vélanna.

Fram til þessa hafa myndavélar í Árborg verið tengdar beint inn á lögreglustöðina en nú munu að auki tengjast vélar frá Hvolsvelli, Hellu og Hveragerði, þar sem vélarnar hafa verið á lokuðum netþjón á bæjarskrifstofunum.

Nú er í undirbúningi er að setja upp vélar með sýn á Suðurstrandaveg og Þorlákshafnarveg við hringtorgið við Þorlákshöfn. Fleiri sveitarfélög hafa sýnt verkefninu áhuga en reynslan sýnir að tilvist slíkra véla hefur umtalsvert forvarnargildi þegar að brotastarfsemi kemur.

Lögreglan á Suðurlandi leggur til netþjón sem vistar myndefnið og skráningarnúmer þeirra bifreiða sem fara hjá en þar sem settar eru upp nýjar vélar eru notaðar sérstakar vélar í númeralestur.  Lögregla hefur ein aðgang að því efni sem safnast með vöktuninni og er því sjálfkrafa eytt að liðnum ákveðnum tíma frá því mynd er tekin.

Með númeralestrinum mun lögregla geta leitað sérstaklega eftir því hvort eftirlýst ökutæki hafa farið um þar sem vöktunin á sér stað.  Neyðarlínan sér um gagnaflutninginn frá vélunum að lögreglustöð og hvert sveitarfélag um sig ber kostnað af kaupum og uppsetningu myndavélanna.

Með númeralestri opnast ýmsir möguleikar.  Þannig er nú til skoðunar hvort setja megi upp slíkar vélar beggja vegna við rýmingarsvæði í Öræfum sem myndi, ef þörf krefur, gefa greinargóðar upplýsingar um fjölda ökutækja inni á rýmingarsvæði og hvernig rýming gengur ef hún er sett í gang. Þessi hugmynd kom upp þegar farið var að hugleiða hvernig væri unnt að fylgja eftir rýmingu á svæði þar sem flestir þeir sem þurfa að yfirgefa það eru ferðamenn.

  • email Senda frétt
  • print Prentvæn útgáfa
  • Plain text Einfaldur texti