Ríkinu til minnkunar að sinna dalnum ekki betur

Leturstærð: Decrease font Enlarge font
image Í Reykjadal. Ljósmynd/Hveragerðisbær

Bæjarstjórn Hveragerðis mótmælir harðlega vinnubrögðum Umhverfisstofnunar varðandi framlengingu á lokun göngustígsins inn Reykjadal.

Stígurinn hefur verið lokaður síðan í lok mars og í bókun bæjarstjórnar segir að síðan þá hafi engar leiðbeiningar verið gefnar af stofnuninni um það til hvaða ráða skuli grípa til að hægt sé að opna stíginn. Starfsmenn Umhverfisstofnunar hafa staðið vaktina og vísað fólki frá án þess að koma sveitarfélögum á svæðinu til aðstoðar varðandi leiðbeiningar um nauðsynlegar úrbætur.

"Hveragerðisbær og Sveitarfélagið Ölfus hafa á undanförnum árum í samvinnu við Landbúnaðarháskólann staðið fyrir miklum úrbótum í Reykjadal enda hefur umhverfið allt tekið stakkaskiptum til hins betra. Það er aftur á móti eiganda dalsins, íslenska ríkinu, til minnkunar að sinna ekki betur um eina fjölförnustu gönguleið á Íslandi en um 300.000 manns leggja leið sína í dalinn árlega," segir í bókun bæjarstjórnar sem telur augljóst að landvarsla í dalnum myndi bæta umgengni og sé því nauðsynleg.

"Ennfremur telur bæjarstjórn löngu tímabært að fundin verði önnur reiðleið sem létta myndi álagi af göngustígnum. Bæjarstjórn óttast að skortur á landvörslu, leiðbeiningum, fjármagni og sinnuleysi stjórnvalda almennt muni valda skaða í dalnum og í kjölfarið valda rekstraraðilum í Hvergerði ómældum tekjumissi og skaða og krefst því aðgerða og úrbóta á vegum landeiganda nú þegar."

Bæjarstjórn hefur óskað eftir fundi með fulltrúum Umhverfisstofnunar nú þegar þar sem mál Reykjadals verði rædd.

  • email Senda frétt
  • print Prentvæn útgáfa
  • Plain text Einfaldur texti