Þjóðskrá Íslands hefur endurmetið niðurstöður undirskriftasöfnunar um miðbæjarskipulagið á Selfossi en vegna mistaka þá voru rafrænar undirskriftir ekki inn í fyrstu tölum Þjóðskrár Íslands.
Þetta kemur fram í fréttatilkynningu frá forráðamönnum undirskriftarsöfnunarinnar.
Þess vegna er niðurstaða Þjóðskrár Ísland að hærra hlutfall kjósenda óskaði eftir íbúakosningu en áður hafði verið talið.
Alls óskuðu 2.125 eða 32,4% kjósenda eftir því að aðalskipulagið færi í íbúakosningu og 2.138 eða 32,6% kjósenda óskuðu eftir því að deiliskipulagið færi í íbúakosningu. Þetta er um 12% hærra hlutfall en nauðsynlegt er samkvæmt samþykktum sveitarfélagsins, sem er 29%.
„Vegna umræðu á netinu um afhendingu gagnanna til Þjóðskrár Íslands þá viljum við benda á að það er krafa um það í reglugerð 155/2013 að ábyrgðarmenn undirskriftasöfnunar komi upplýsingum á rafrænt form. Þess vegna sendi Þjóðskrá Íslands okkur undirskriftalistana til baka til að koma ákveðnum upplýsingum á rafrænt form. Við gerðum það samkvæmt þeirra leiðbeiningum, gögnin innsigluð aftur og sent aftur til Þjóðskrár Ísland. Með öðrum orðum; þetta var gert eins og lög og reglur kveða á um,“ segir í fréttatilkynningunni.
„Vegna yfirlýsingar framkvæmdastjóra Árborgar um það að undirskriftalistarnir skuli birtir er þau fá þá í hendurnar þá er rétt að benda á það að lögfræðingur dómsmálaráðuneytis benti okkur á það að undirskriftirnar væru persónuupplýsingar og því bæri að fara með þær í samræmi við lög um persónuvernd og meðferð persónuupplýsinga. Og það sé Persónuvernd sem fer með eftirlit á þessu sviði. Samkvæmt samtali við Persónuvernd er ekki heimild fyrir að birta þessa lista opinberlega samkvæmt persónuverndarlögum. Sveitarstjórn þarf að sýna fram á lögmætan tilgang ef undirskriftirnar verða meðhöndlaðar á einn eða annan hátt,“ segir ennfremur í fréttatilkynningunni.