Samið um uppsetningu og rekstur FabLab verkstæðis í FSu

Fjölbrautaskóli Suðurlands, Samtök sunnlenskra sveitarfélaga, Héraðsnefnd Árnesinga og Háskólafélag Suðurlands skrifuðu í síðustu viku undir samkomulag um uppsetningu og rekstur á FabLab verkstæði í FSu.

Með því að ráðast í uppsetningu og reksturs á FabLab (Fabrication Laboratory) verkstæði opnast aðgangur fyrir grunn- og framhaldskóla, atvinnulíf og íbúa að stafrænni smiðju með tækjum og tólum til að búa til nánast hvað sem er. FabLab smiðja gefur einstaklingum tækifæri til að þjálfa sköpunargáfuna og hrinda hugmyndum sínum í framkvæmd með því að hanna, móta og framleiða hluti með aðstoð stafrænnar tækni. Með uppsetningu og rekstri FabLab smiðju opnast hvetjandi umhverfi til nýsköpunar, menntunar og þróunar í Árnessýslu þar sem einstaklingar geta raungert hugmyndir sínar.

Skipuð verður fimm manna undirbúningsnefnd sem jafnframt verður stýrihópur verkefnisins. Ingunn Jónsdóttir, ráðgjafi hjá HfSu á vegum SASS, er verkefnisstjóri og mun hún starfa að undirbúningi málsins. Undirbúningsnefnd mun ákvarða framkvæmd uppbyggingarinnar og skilgreina verkefnið með það að markmiði að starfsemi geti hafist frá og með hausti 2018. Verkþættir og tímasetningar verða nánar skilgreindar af undirbúningsnefnd.

Framlög samstarfsaðila til verkefnisins verða margskonar. Má þar nefna fjármagn, þekkingu, vinnuframlag, sérfræðiþekkingu, aðstöðu og fleira.

Atorka – samtök atvinnurekenda á Suðurlandi, er virkur samstarfsaðili í verkefninu og mun með aðstoð aðildarfélaga og annarra aðila, leggja verkefninu til fjármuni til kaupa á tækjabúnaði í upphafi verkefnisins. Jafnframt verður öðrum hollvinum skólans og/eða þessa verkefnis gefinn kostur á að styrkja það.

Á myndinni sem fylgir fréttinni eru Sigurður Sigursveinsson fyrir hönd HFSu, Olga Lísa Garðasdóttir, skólameistari, Ari Björn Thorarinssen fyrir hönd Héraðsnefndar Árnesþings og Gunnar Þorgeirsson, formaður SASS, við undirritun samningsins.

Fyrri greinUmferð um Dyrhólaey takmörkuð
Næsta greinSigurður Andrés: Að byggja upp bæ