Viðbygging við Kirkjuhvol vígð

Leturstærð: Decrease font Enlarge font
image Guðrún og María lögðu Ólöfu Guðbjörgu lið við að klippa á borðann. Ljósmynd/Rangárþing eystra

Í gær fór fram vígsluathöfn vegna nýrrar viðbyggingar við hjúkrunar- og dvalarheimilið Kirkjuhvol á Hvolsvelli. Um 300 gestir voru viðstaddir og tókst athöfnin í alla staði vel.

Ísólfur Gylfi Pálmason, sveitarstjóri, Lilja Einarsdóttir, oddviti, og Ólöf Guðbjörg Eggertsdóttir, hjúkrunarforstjóri, fluttu ávörp í tilefni dagsins. Frú Agnes M. Sigurðardóttir, biskup Íslands, blessaði nýju viðbygginguna og færði samfélaginu kærar hamingjuóskir.

Kvenfélagið Eining færði heimilinu hjól þar sem tveir geta hjólað en einnig er hægt að hafa það rafknúið. Kvenfélagið Hallgerður færði heimilinu sjúkrarúm og náttborð sem nú þegar er búið að setja upp í herbergi í nýju viðbyggingunni. 

Barnakór Hvolsskóla flutti tvö lög, systurnar Íris og Elísabet Dudziak spiluðu á píanó og fiðlu og þeir Jón Ágústsson og Jens Sigurðsson spiluðu á gítar. Félagar úr Harmonikkufélagi Rangæinga spiluðu svo meðan gestir gengu um viðbygginguna og fengu sér kaffi og hátíðarköku.

Það voru þær Guðrún Sveinsdóttir og María Jónsdóttir sem að lögðu Ólöfu Guðbjörgu lið við að klippa á borðann en þær eru íbúar á Kirkjuhvoli og hafa báðar náð 100 ára aldri.

  • email Senda frétt
  • print Prentvæn útgáfa
  • Plain text Einfaldur texti