Síðastliðinn mánudag kom maður á þrítugsaldri á lögreglustöðina á Selfossi og lagði fram kæru á hendur öðrum manni sem hann sagði hafa haldið sér föngnum, annarsvegar í sumarbústað í Árnessýslu og hinsvegar í bíl viðkomandi.
Einnig mun hinn kærði, sem einnig er á þrítugsaldri, hafa veist að manninum með barsmíðum þar sem skiptilykli og kylfu mun hafa verið beitt ásamt hótunum um frekari barsmíðar.
Umrætt atvik mun hafa átt sér stað í liðinni viku og voru bæði viðkomandi sumarbústaður, sem og bifreið sem hald var lagt á í Reykjavík, rannsökuð sem mögulegir brotavettvangar.
Tilkynnandinn leitaði læknis vegna málsins til að fá gert að áverkum sem hann bar á líkamanum. Hann telur að meint frelsissvipting hafi varað í einhverjar klukkustundir.
Meintur gerandi var handtekinn að kvöldi þriðjudags í sumarbústaðnum sem um ræðir og færður í fangageymslur. Hann kannaðist við málið við yfirheyrslur hjá lögreglu.
Tæknideild Lögreglunnar á höfuðborgarsvæðinu var fengin til að aðstoða við tæknirannsókn á vettvöngunum tveimur.
Í ljós kom að meintur gerandi var á reynslulausn og eru fyrrgreind brot talin rof á þeirri reynslulausn. Því var gerð var krafa fyrir Héraðsdómi Suðurlands um að hann skyldi ljúka afplánun sinni og féllst dómari á þá körfu lögreglustjóra. Maðurinn er því kominn til afplánunar í fangelsi á ný.