Gleðilegt sumar!

Sumar og vetur frusu ekki saman en hvergi á Suðurlandi var frost í nótt. Frjósi sumar og vetur saman segir íslensk þjóðtrú það góðs viti og að heyfengur verði góður í sumar.

Hiti fór hvergi niður fyrir frostmark í nótt en á miðnætti var 5,5°C á Hellisheiði og 2,7°C í Tindfjöllum. Á láglendi var 8,1°C á Eyrarbakka á sama tíma og 8,5°C á Hellu.

Í bókinni Sögu daganna segir Árni Björnsson að hvarvetna hafi verið fylgst með því hvort frost væri aðfaranótt sumardagsins fyrsta, þ.e. hvort saman frysti sumar og vetur.

Yfirleitt var það talið góðs viti og jafnvel álitið að rjóminn ofan á mjólkurtrogunum yrði jafn þykkur og ísskánin á vatninu þessa nótt. Í því skyni settu menn skál eða skel með vatni út um kvöldið og vitjuðu svo eldsnemma morguns.

Frá því mælingar sunnlenska.is hófust hafa sumar og vetur frosið saman á hverju ári undanfarin átta ár, að árunum 2014 og 2017 undanskildum. Árið 2014 varð sumarið óvenju hlýtt en um leið mjög úrkomusamt, langt umfram meðallag. Árið 2017 var maí óvenju hlýr og úrkoma í meira lagi, svo tók við gott sumar og sólskinsstundir vel yfir meðallagi sunnan lands.

Sunnlenska.is óskar lesendum sínum gleðilegs sumars.

Fyrri greinStórtónleikar í Vallaskóla í kvöld
Næsta greinLeitað að framúrskarandi ungum Íslendingum