Umhverfisstofnun hefur gripið til þess ráðs að loka göngustígnum inn í Reykjadal vegna aurbleytu uns bót verður á. Lokunin tekur gildi klukkan 10 í fyrramálið, laugardaginn, 31. mars.
Þetta er gert til að vernda gróður og landslag umhverfis göngustíginn. Mikill fjöldi ferðamanna heimsækir Reykjadal í Ölfusi dag hvern. Vegna veðrabreytinga, hlýinda og vætu í göngustíg er álag á stíginn og umhverfi hans gríðarlegt.
Stefnt er að því að endurskoða lokunina eigi síðar en innan tveggja vikna eða fyrr ef ástand breytist.
Lokunin er gerð samkvæmt lögum um náttúruvernd en umrætt svæði er nr. 752 á náttúruminjaskrá.