Karlmaður var fluttur með þyrlu Landhelgisgæslunnar á slysadeild í Reykjavík eftir að stór hjólagrafa sem hann ók valt af tengivagni á sveitabæ á Rangárvöllum, sunnan við Hvolsvöll, í gærkvöldi.
Maðurinn var að aka gröfunni af vagninum þegar hún valt.
Slysið varð um klukkan hálf ellefu í gærkvöldi og var mikill viðbúnaður vegna þess hjá lögreglu, sjúkraflutningum og björgunarsveitum, sem kallaðar voru á vettvang ásamt þyrlu Gæslunnar.
Talsverðan tíma tók að ná manninum út úr gröfunni en meðal annars voru spilvírar á björgunarsveitarbílnum notaðir til þess að lyfta henni. Samkvæmt upplýsingum frá lögreglu var maðurinn með meðvitund allan tímann og minna slasaður en í upphafi var talið.