Sunnlendingum fjölgaði um 5,6% á síðasta ári og eru komnir yfir 22 þúsund í fyrsta sinn, voru 22.222 þann 1. janúar síðastliðinn. Árið 2017 varð fjölgun í öllum sveitarfélögum á Suðurlandi nema tveimur.
Hagstofan hefur gefið út tölulegar upplýsingar um fjölda landsmanna þann 1. janúar 2018. Í samantekt sunnlenska.is eru taldir íbúar í Árnessýslu, Rangárvallasýslu og V-Skaftafellssýslu.
Íbúum fjölgaði í öllum sveitarfélögum Suðurlands á síðasta ári, nema í Ásahreppi og Flóahreppi. Í Ásahreppi fækkaði um 9 íbúa, eða -3,5%. Íbúum Flóahrepps fækkaði um 4, eða -0,6%.
Skeiða- og Gnúpverjahreppur upp í 8. sætið
Mesta fjölgunin var hins vegar í Skaftárhreppi, þar sem íbúum fjölgaði um 17,9%, eða 85 íbúa. Einnig var mikil hlutfallsleg fjölgun í Mýrdalshreppi, þar sem fjölgaði um 12,6% eða 71 íbúa. Ekki eru mörg ár síðan þessi tvö sveitarfélög glímdu við stöðuga fækkun íbúa ár frá ári.
Annað árið í röð fjölgaði íbúum í Skeiða- og Gnúpverjahreppi hlutfallslega mikið. Alls bættust 96 íbúar við í sveitarfélaginu sem er fjölgun upp á 16,2%. Frá 2016 til 2017 fjölgaði íbúum í Skeiða- og Gnúpverjahreppi um 14%. Skeiðamenn og Gnúpverjar voru 690 talsins og búa nú í áttunda fjölmennasta sveitarfélaginu á Suðurlandi og fara uppfyrir Flóahrepp.
Íbúafjöldinn í Árborg tók stökk
Mesta tölulega fjölgunin var eins og áður í Árborg. Þar tók íbúafjöldinn stökk, fjölgaði um 524 íbúa eða 6,2% sem er mun meiri fjölgun en á síðustu árum. Íbúar Árborgar voru 8.995 á nýársdag. Níuþúsundasti íbúinn var svo skráður til heimilis í Árborg þann 5. janúar.
Alls fjölgaði íbúum Suðurlands um 1.173 á árinu 2017. Fjölgunin á Suðurlandi er 5,6%, sem er vel umfram landsmeðaltal. Landsmönnum fjölgaði alls um 3% og voru Íslendingar búsettir á landinu 348.450 talsins um síðustu áramót.
Íbúafjöldi í sunnlenskum sveitarfélögum 1. janúar 2018:
Sveitarfélagið Árborg 8.995
Hveragerði 2.566
Sveitarfélagið Ölfus 2.111
Rangárþing eystra 1.798
Rangárþing ytra 1.610
Bláskógabyggð 1.115
Hrunamannahreppur 774
Skeiða- og Gnúpverjahreppur 690
Flóahreppur 644
Mýrdalshreppur 633
Skaftárhreppur 560
Grímsnes- og Grafningshreppur 479
Ásahreppur 247
SAMTALS 22.222