Leita manns í íshellinum í Blágnípujökli

Mynd úr safni. Ljósmynd/Björgunarfélag Árborgar

Björgunarsveitir af Suður- og Norðurlandi ásamt þyrlu Landhelgisgæslunnar með reykkafara frá Ísafirði eru nú á leið í íshelli í í Blágnípujökli, suðvestur af Hofsjökli í Bláskógabyggð.

Þar er nú leitað að einum manni sem mun hafa farið inn í hellinn en ekki skilað sér þaðan aftur. Aðgerðin er umfangsmikil en öll vinna í hellinum mun þurfa að fara fram með aðfluttu lofti til björgunarmanna vegna hárra gilda SO2, brennisteinsmengunar, í hellinum.

Útkallið kom til lögreglunnar á Suðurlandi um kl. 18:00 í dag frá samferðafólki mannsins. Gert var ráð fyrir að fyrstu björgunarmenn yrðu komnir á staðinn með þyrlunni kl. 19:30 en gripið var til þess ráðs að manna hana með reykköfurum frá Ísafirði vegna þess að hún var stödd þar þegar útkallið kom.

Ekki er vitað hvað veldur því að maðurinn skilar sér ekki til baka úr hellinum.

Lögreglan varaði á dögunum við bráðahættuástandi vegna vegna styrks brennisteinsvetnis í hellinum.

UPPFÆRT KL. 21:10:
Fyrstu björgunarsveitarmenn eru nú komnir á vettvang við íshellinn í Hofsjökli. Vitað er að styrkleiki brennisteinsvetnis er hár í hellinum enda voru þeir sem voru í samfylgd með manninum sem nú er leitað með mælitæki meðferðis.

Verkefni fyrstu manna er að setja upp búnað til björgunaraðgerða en lagt er upp úr því að það gerist hratt og örugglega en að öryggi björgunarmanna sé tryggt.

Þyrla LHG skilaði fystu mönnum í Kerlingafjöll en þaðan voru þeir fluttir með snjósleðum starfsmanna í Kerlingafjöllum á vettvang. Á vettvangi eru menn sem þekkja vel til á þessum slóðum og hafa leiðbeint um aðgerðir.

Lögregla hefur upplýst aðstandendur mannsins sem leitað er að um stöðu mála.

Aðgerðarstjórnstöð er í Björgunarmiðstöðinni við Árveg á Selfossi.

UPPFÆRT KL. 21:50:
Fyrstu menn eru nú komnir inn í íshellinn til leitar. Um 130 björgunarsveitarmenn eru á leið eða komnir á vettvang og eru þá liðsmenn slökkviliða og sjúkraflutninga ótaldir.

UPPFÆRT KL. 23:40:
Að því er fram kemur á Facebooksíðu Sjúkraflutninga HSu er maðurinn fundinn án lífsmarka og er unnið að því að koma honum upp úr hellinum. Mikil áhersla er lögð á öryggi björgunarmanna vegna mögulegrar gasmengunar í hellinum.

Fyrri greinLangþráður sigur á meistaramóti 15-22 ára í frjálsum
Næsta greinSætur sigur í Vestmanneyjum