Í haust fluttu frístundaheimilið Skólasel og félagsmiðstöðin Skjálftaskjól í Hveragerði starfsemi sína að Breiðumörk 27a, þar sem leikskólinn Undraland var áður til húsa.
Fyrir skemmstu var svo efnt til nafnasamkeppni fyrir húsið og bárust ríflega áttatíu tillögur. Niðurstöður fjölskipaðrar dómnefndar var að nafnið „Bungubrekka“ fékk flest atkvæði, svo miklu munaði.
Það var Júlíana Hilmisdóttir sem átti vinningstillöguna, sem dregur nafn sitt af samnefndri brekku á lóð hússins. Í dag var svo nafnið tekið formlega í notkun þegar skilti með því var afhjúpað með viðhöfn. Við það tækifæri tók Júlíana við blómvendi og gjafabréfi frá Skyrgerðinni og Varmá, í viðurkenningarskyni.
Júlíana starfaði um árabil á leikskólanum Undralandi og man eftir því að hafa oft farið um Bungubrekku í æsku og ekki síst á sleða þar sem brekkan var ein vinælasta sleðabrekka bæjarsins á sínum tíma. Það er því greinilegt að bæði húsið og nafnið tengjast henni sterkum böndum.
Með Júlíönu á myndinni eru Elín Esther Magnúsdóttir, forstöðumaður Skólasels og Skjálftaskjóls og Aldís Hafsteinsdóttir bæjarstjóri Hveragerðisbæjar, ásamt Andra Kjartani Andersen, Kristófer Atla Kárasyni og Önnu Lind Jónsdóttur en þau starfa öll í Skólaseli.