Náðu ekki að ljúka viðræðum fyrir komandi sveitarstjórnarkosningar

Kirkjubæjarklaustur. sunnlenska.is/Sigurður Hjálmarsson

Samstarfsnefnd vegna sameiningar Djúpavogshrepps, Sveitarfélagsins Hornafjarðar og Skaftárhrepps hefur lokið störfum án þess að skila formlegu áliti um mögulega sameiningu sveitarfélaganna.

Nefndin er sammála um að viðræður sem staðið hafa yfir frá því um mitt ár 2016 hafi verið lærdómsríkar og aukið skilning milli sveitarfélaganna varðandi stjórnsýslu, stöðu og fyrirkomulag hinna ýmsu málaflokka innan þeirra.

Sú staða sem kom upp í landsmálum á tímabilinu með alþingiskosningum, stjórnarmyndun í kjölfarið, og þeirri óvissu sem þeim fylgdi varð til þess að ekki náðist að ljúka viðræðunum í tíma fyrir komandi sveitarstjórnarkosningar. Á það sérstaklega við um ýmis áhersluverkefni sem sveitarfélögin vildu koma á laggirnar með stuðningi stjórnvalda og nýtt fyrirkomulag um stjórnskipulag sameinaðs sveitarfélags.

Af þessum sökum varð það samhljóða ákvörðun nefndarinnar að ljúka störfum án þess að skila formlegu áliti um mögulega sameiningu sveitarfélaganna.

Fyrri greinLeitað að Ríkharði á Selfossi
Næsta greinLeitinni að Ríkharði frestað til morguns