Sú hefð hefur skapast í Hveragerði að jólatré bæjarbúa sem staðsett er í smágörðunum er ávallt gjöf frá bæjarbúum, sem nýta þetta tækifæri til að gefa trjám framhaldslíf sem ekki rúmast lengur í einkagarðinum.
Í ár voru það hjónin Jenný Hugrún Wiium og Þorsteinn Hansen sem gáfu jólatréð en þau búa í Arnarheiði. Tréð þeirra hefur í áraraðir verið afar fallega skreytt um jól og verið til mikillar prýði í Arnarheiðinni.
En núna var komið að leiðarlokum og því fékk tréð þetta góða hlutverk að gleðja alla bæjarbúa á aðventu og um hátíðina.
Það voru barnabörnin þau Jenný Sigrún og Maríus sem fengu það hlutverk að tendra ljósin á trénu á fyrsta sunnudegi í aðventu.
Á myndinni hér að neðan má sjá þegar tréð var fjarlægt úr garði Jennýar og Þorsteins.
Ljósmynd/Höskuldur Þorbjarnarson