Lögreglan á Suðurlandi færði 21 umferðaróhapp til bókar í síðustu viku. Helmingur þeirra varð í Skaftafellssýslunum og í flestum tilvikum var ekið of hratt í hálkunni.
Aðeins einn ökumaður slasaðist í þessum óhöppum, en karlmaður sem missti bifreið sína út af Bakkavegi í Landeyjum síðastliðinn sunnudag var fluttur undir læknishendur með áverka á handlegg.
Þrettán ökumenn voru kærðir fyrir að aka of hratt í liðinni viku þrátt fyrir að aðstæður til aksturs væru ekki þær bestu.