Brúarljós voru tendruð á Hvítárbrú laugardaginn 9. desember síðastliðinn að viðstöddum fjölda fólks. Um leið var brúin opnuð formlega á sérstakan og fremur óvenjulegan hátt.
Framkvæmdur var gjörningur þar sem þátt tóku tveir einstaklingar sem hafa átt heima sitt hvoru megin við Hvítá frá fæðingu. Þetta voru þau Ásta Skúladóttir á Sólveigarstöðum, fædd í Hveratúni í Laugarási og Guðmundur Ingólfsson, á Iðu. Þá tóku þátt í þessari formlegu opnunarathöfn þau Unnur Malín Sigurðardóttir, sem flutti tónlist og vígslubiskupinn Kristján Valur Ingólfsson, sem þarna var maður orðsins.
Gjörningurinn fólst í því að Ásta og Guðmundur kveiktu á kyndlum sem komið hafði verið fyrir á brúarhandriðunum, hvort frá sínum enda brúarinnar og mættust síðan á miðri brúnni. Þar með taldist brúin hafa verið opnuð formlega og í þann mund voru ljósin kveikt á nýrri ljósakeðju sem sett var upp á burðarstrengi brúarinnar. Síðasti hluti þessarar uppákomu fólst í því að börnum á staðnum var boðið að ganga fyrst inn á brúna og umkringja Ástu og Guðmund og þannig taka við mannvirkinu fyrir hönd framtíðarinnar.
Það voru íbúar í Skálholtssókn sem áttu frumkvæði að þessu verkefni og hrintu því í framkvæmd og fyrir þeim fóru þau Páll M. Skúlason, Elinborg Sigurðardóttir og Jakob Narfi Hjaltason. Fjölmargir einstaklingar, félög, fyrirtæki og stofnanir lögðu sitt af mörkum í smáu eða stóru, meðal annars Uppbyggingarsjóður Suðurlands, Kvenfélag Biskupstungna, Lionsklúbburinn Geysir og Vegagerðin. Þessir aðilar gáfu hæstu upphæðirnar til verkefnisins.
Í lok athafnarinnar á brúnni hófu gestir kyndlana 32 á loft og héldu í blysför í Dýragarðinn í Slakka þar sem húsráðendur tóku við gestunum af einstökum höfðingsskap og velvild, eins og þeim er lagið. Fyrir utan heitt kakó, kaffi og smákökur sem Slakkafólkið bauð gestum, lögðu fjölmargir íbúar í Skálholtssókn allskyns góðgæti á borð í því sem kallast mun „Pálínuboð“.
Í Slakka var myndasýning á tjaldi, þar sem sýndar voru gamlar myndir frá því fyrir daga brúarinnar og meðan á byggingu hennar stóð. Þá tóku einnig ýmsir til máls, þar á meðal Marinó Þ. Guðmundsson, sem vann við lokaáfanga brúarbyggingarinnar haustið 1957.
Í kaffisamsætinu í Slakka afhentu systkinin frá Iðu, þau Jóhanna, Guðmundur, Hólmfríður og Loftur, peningagjöf til minningar um foreldra sína þau Margréti Guðmundsdóttur og Ingólf Jóhannsson. Gjöfinni er ætlað að vera fyrsti vísirinn að gerð söguskiltis við Hvítárbrú.
Ljósmyndir/Marinó Már Magnússon