Hárrétt viðbrögð íbúa komu í veg fyrir stórtjón

Eldur kom upp í þurrkara í íbúðarhúsnæði í Hveragerði síðastliðið föstudagskvöld. Þegar íbúar húsnæðisins urðu eldsins varir réðust þau með duftslökkvitæki gegn eldinum en það dugði ekki til.

Þau lokuðu þá hurðinni að rýminu og komu sér hið snarast út og hringdu á Neyðarlínuna 112 og óskuðu eftir aðstoð slökkviliðs.

Þannig vildi til að slökkviliðsmaður hjá Brunavörnum Árnessýslu sem fékk útkallið var í næsta nágrenni og var kominn á staðinn rétt eftir að útkallið barst. Hann mat aðstæður þannig að hann gæti á öruggan hátt farið inn með annað slökkvitæki og skotið á eldinn til þess að tefja fyrir útbreiðslu eldsins sem hann og gerði.

Slökkviliðsmenn frá starfsstöð Brunavarna Árnessýslu í Hveragerði voru fljótir á vettvang á dælubíl og réðu að lokum endanlega niðurlögum eldsins með vasklegri framgöngu reykkafara.

Í frétt frá Brunavörnum Árnesinga segir að það sé ljóst að íbúar hússins hafi án efa komið í veg fyrir stórfellt tjón með sínu snarræði. Með því að hringja hið snarasta í 112, hafa til taks slökkvitæki, nota það á réttann hátt og loka eldinn inni í rýminu þannig að súrefnisskortur skapaðist í umhverfi eldsins.

Fyrri greinGefum jólaljósum lengra líf
Næsta greinBifreið brann í Kömbunum