Víðir og Jóhann til KSÍ

Knattspyrnusamband Íslands hefur ráðið tvo nýja starfsmenn til starfa, þá Jóhann Ólaf Sigurðsson í markaðsdeild og Víði Reynisson í landsliðsdeild.

Jóhann Ólafur er Selfyssingur með meistarapróf í íþróttablaðamennsku. Hann starfaði meðal annars á Evrópumeistaramótinu í Frakklandi 2016 sem sérstakur fréttaritari UEFA með íslenska liðinu. Jóhann hefur verið í hlutastarfi hjá KSÍ um nokkurt skeið og mun hann starfa við markaðs- og fjölmiðlamál.

Víðir hefur undanfarið starfað sem lögreglufulltrúi og verkefnastjóri almannavarna hjá Lögreglunni á Suðurlandi. Hann hefur einnig starfað fyrir KSÍ um árabil í hlutastarfi sem öryggisstjóri Laugardalsvallar og sem öryggisstjóri landsliða.

Báðir eru þeir nú ráðnir í fullt starf fram yfir úrslitakeppni Heimsmeistaramótsins 2018 í Rússlandi. Jóhann Ólafur hóf störf 1. desember síðastliðinn, en Víðir mun hefja störf að fullu í febrúar 2018.

Fyrri greinSelfoss varð undir í Eyjum
Næsta greinFjölnissigur í Frystikistunni