Sjö slys voru tilkynnt til lögreglunnar á Suðurlandi í liðinni viku. Í einu þeirra slasaðist tamningamaður á fæti þegar hestur sló hann illa.
Viðkomandi var fluttur á sjúkrahús til aðhlynningar.
Þrjú slys urðu með þeim hætti að gangandi vegfarandi féll í hálku en enginn þeirra er talinn alvarlega slasaður.
Þá slasaðist karlmaður þegar hann féll af vélsleða í skipulagðri ferð á Mýrdalsjökli. Hann var talinn hafa farið úr axlarlið og var fluttur af jöklinum af ferðaþjónustufyrirtækinu og áfram undir læknishendur með sjúkrabifreið.
Þetta kemur fram í dagbók lögreglunnar á Suðurlandi.