Þrír ökumenn eru grunaðir um að hafa ekið ölvaðir í liðinni viku í umdæmi lögreglustjórans á Suðurlandi. Tuttugu og sex voru kærðir fyrir að aka of hratt í umdæminu á sama tíma.
Einn þeirra sem grunaðir eru um ölvunarakstur, kona á fertugs aldri, er auk þess grunuð um að hafa verið undir áhrifum lyfja en ökuferð hennar endaði á Pylsuvagninum á Selfossi að kvöldi föstudagsins síðasta. Ekki urðu slys á fólki.
Önnur kona, erlendur ferðamaður, var stöðvuð á Hellu og lauk máli sínu degi síðar með því að gangast undir sektargerð og sviptingu ökuréttar. Blóðsýni hennar var sett í flýtimeðferð hjá Rannsóknarstöfu Háskólans svo unnt væri að ljúka málinu áður en kærða færi af landi brott. Þriðji aðilinn, erlendur karlmaður búsettur á Íslandi var einnig stöðvaður á Hellu sama kvöld.
Í dagbók lögreglunnar á Suðurlandi kemur einnig fram að 26 voru kærðir fyrir að aka of hratt í umdæminu í liðinni viku. Fimm þeirra í nágrenni Víkur, átta í nágrenni Kirkjubæjarklausturs, sjö í lágsveitum Árnessýslu og tveir í uppsveitum. Þrír voru kærðir í Rangárþingi ytra. Þeir sem hraðast óku voru á 148 km/klst og 137 km/klst og segir lögreglan að öllum megi vera ljóst mikilvægi þess að ná böndum um slíka hegðun ökumanna í umferðinni.