Friðlýsing vegna stækkunar friðlandsins í Þjórsárverum undirrituð

Leturstærð: Decrease font Enlarge font
image Þjórsárver. Ljósmynd/Þóra Ellen

Björt Ólafsdóttir, umhverfis- og auðlindaráðherra undirritaði í dag auglýsingu um friðlýsingu vegna stækkunar friðlandsins í Þjórsárverum.

Undanfarin ár hefur verið unnið að stækkun friðlandsins í Þjórsárverum til samræmis við samþykktir Alþingis á grundvelli náttúruverndaráætlunar og verndar- og orkunýtingaráætlunar. Svæðið var friðlýst árið 1981 og náði þá til 375 ferkílómetra. Með stækkuninni nú verður friðlandið í Þjórsárverum alls 1.563 ferkílómetrar. Fylgir friðlýsingin, sem nú hefur verið undirrituð, því samkomulagi sem náðist með hlutaðeigandi sveitarstjórnum vorið 2013 um afmörkun hins friðlýsta svæðis og þá friðlýsingarskilmála sem gilda eiga um það svæði.

Ráðherra kynnti áform um stækkun friðlandsins á fundi með viðkomandi sveitarstjórnum í júní síðastliðnum og var tillaga þess efnis í kjölfarið sett í opið umsagnarferli á vef ráðuneytisins í þrjá mánuði, sem lauk 3. október síðastliðinn.  Alls bárust ráðuneytinu átta umsagnir þar sem fram kom almennur velvilji gagnvart friðlýsingunni.

Í tilkynningu frá ráðuneytinu segir að Þjórsárver hafi mikla sérstöðu og séu mikilvæg á alþjóðlega vísu. Þjórsárver eru ein víðáttumesta gróðurvin miðhálendisins, og er lífríki þeirra fjölskrúðugt og einstakt. Má þar sérstaklega nefna vistkerfi veranna, votlendi, varpstöðvar heiðagæsa, víðerni og sérstaka landslagsheild. Með stækkun friðlands í Þjórsárverum næst það markmið að tryggja víðtæka og markvissa verndun svæðisins í heild sinni.

Í kjölfar friðlýsingarinnar mun Umhverfisstofnun hefja vinnu við undirbúning að gerð stjórnunar- og verndaráætlunar fyrir svæðið í samvinnu við sveitarstjórnir á svæðinu. Jafnframt mun samráð vera haft vegna ráðstöfunar skilgreinds fjárframlags ríkisins til svæðisins, í samræmi við samkomulag sem gert var árið 2013.

  • email Senda frétt
  • print Prentvæn útgáfa
  • Plain text Einfaldur texti