Selfyssingurinn Einar Guðmundsson hefur verið ráðinn íþróttastjóri Handknattleikssambands Íslands og mun hafa umsjón með afreksstarfi sambandsins.
Einar er 48 ára, fyrrum leikmaður Selfoss í handknattleik og lék með yngri landsliðunum á árum áður. Hann hefur verið handknattleiksþjálfari í 30 ár, þjálfað m.a. í Noregi og á Selfossi þar sem hann hefur verið yfirþjálfari.
Hann hefur verðið unglingalandsliðsþjálfari undanfarin 12 ár og m.a. unnið tvívegis til verðlauna á heimsmeistaramóti unglinga, silfurverðlaun í Túnis 2009 og bronsverðlaun í Rússlandi 2015.
Einar er menntaður íþróttakennari og er að ljúka MS-gráðu í stjórnun nú um áramót frá Háskólanum á Bifröst. Þá hefur Einar lokið 3. stigi í þjálfaramenntun HSÍ. Hann hefur starfað sem kennari og skólastjórnandi undanfarin 23 ár, síðast sem aðstoðarskólastjóri í Vallaskóla á Selfossi.