„Fer ekki vel að höggva í þann sem er veikastur fyrir“

Byggðaráð Bláskógabyggðar tekur undir áhyggjur Félags sauðfjárbænda í Árnessýslu þegar fyrir liggur að boðuð er lækkun afurðarverðs annað árið í röð.

Í ályktun sem samþykkt var á síðasta fundi byggðaráðs kemur fram að sú lækkun á afurðaverði sem nú hefur verið boðuð muni setja greinina í afar erfiða og óásættanlega stöðu.

„Nauðsynlegt er að líta á þessa kjötframleiðslu, vinnslu og markaðsmál heildstætt og finna leið til lausnar þannig að allir fái eðlilegan afrakstur af sinni starfsemi. Með því að höggva mest í frumframleiðsluna er verið að eyðileggja grunninn að þessari framleiðslugrein og öllum mun blæða,“ segir í bókun byggðaráðs Bláskógabyggðar sem hvetur ríkisvaldið, ráðuneyti atvinnumála og Bændasamtökin til að vinna markvisst og skipulega að lausn málsins og gæta í hvívetna hagsmuna frumframleiðandans, sauðfjárbóndans.

„Án hans verður ekki kjötvinnsla, sala né neysla þessarar frábæru afurðar sem íslenska lambakjötið er. Þessi búgrein hefur ávallt staðið höllum fæti og það fer ekki vel að höggva í þann sem veikastur er fyrir. Það hefur aldrei verið mannsbragur né sómi af, að sparka í liggjandi mann og það á ekki að líða,“ segir ennfremur í bókun byggðaráðs.

Fyrri greinÁrborg með nýtt lið í Útsvarinu
Næsta greinDramatík í Dalhúsum