Stjórn Samtaka sunnlenskra sveitarfélaga ítrekar kröfu sína til heilbrigðisráðuneytisins þess efnis að fyrirhugað hjúkrunarheimili á Selfossi verði hannað miðað við að rúma 60 einstaklinga með stækkunarmöguleika upp í 80-90 hjúkrunarrými, en ekki 50 eins og kveðið er á um í samningi.
Núverandi áætlun um 50 rými gerir ráð fyrir að rýmum á Suðurlandi fjölgi um 15, þar sem 35 rými sem voru fyrir á Blesastöðum og Kumbaravogi gangi inn í hið nýja heimili.
Í bókun sem samþykkt var á síðasta stjórnarfundi SASS segir að fjölgunin sé engan veginn næg til að mæta þörf fyrir hjúkrunarrými á svæðinu.
„Þá verður að horfa til þess að brýn þörf er fyrir rými til að nýta til hvíldarinnlagna í Árnessýslu en nú eru einungis þrjú skilgreind hvíldarrými fyrir íbúa hennar. Íbúum fjölgar mjög hratt í sýslunni og brýnt að horfa til framtíðar hvað fjölda rýma varðar og þeirrar hagkvæmni sem fælist í því að reka fleiri rými í einni og sömu einingunni,“ segir í bókun stjórnarinnar.
Stjórn SASS þykir miður að niðurstaða varðandi fjölgun rýma liggi enn ekki fyrir en skil gagna vegna hönnunarsamkeppni voru í síðustu viku. „Stjórn SASS þykir það bera vott um skammsýni að ekki sé tekin ákvörðun um fjölgun rýma,“ segir ennfremur í bókuninni.