Fjölgunin mætir þörfinni engan veginn

Leturstærð: Decrease font Enlarge font
image Ásta Stefánsdóttir og Kristján Þór Júlíusson handsala samning um byggingu hjúkrunarheimilis í Árborg.

Bæjarráð Árborgar ítrekar beiðni sína til heilbrigðisráðuneytisins þess efnis að fyrirhugað hjúkrunarheimili á Selfossi, sem nú er í undirbúningsferli, verði hannað miðað við að rúma sextíu einstaklinga í hjúkrunarrýmum, en ekki fimmtíu eins og kveðið er á um í samningi aðila. …

Núverandi áætlun um fimmtíu rými gerir ráð fyrir að rýmum á Suðurlandi fjölgi um fimmtán, þar sem 35 rými sem voru fyrir á Blesastöðum og Kumbaravogi gangi inn í hið nýja heimili.

„Fjölgunin er engan veginn næg til að mæta þörf fyrir hjúkrunarrými á svæðinu. Þá verður að horfa til þess að brýn þörf er fyrir rými til að nýta til hvíldarinnlagna í Árnessýslu. Íbúum fjölgar mjög hratt í sýslunni og brýnt að horfa til framtíðar hvað fjölda rýma varðar og þeirrar hagkvæmni sem fælist í því að reka fleiri rými í einni og sömu einingunni,“ segir í bókun sem samþykkt var á síðasta bæjarráðsfundi.

„Bæjarráði þykir miður að niðurstaða varðandi fjölgun rýma liggi enn ekki fyrir, nú þegar talsvert er liðið á undirbúningsferlið og skil gagna vegna hönnunarsamkeppni fara fram í næstu viku. Bæjarráði þykir það bera vott um skammsýni að ekki sé tekin ákvörðun um fjölgun rýma,“ segir ennfremur í bókuninni.

  • email Senda frétt
  • print Prentvæn útgáfa
  • Plain text Einfaldur texti