Lögreglan á Suðurlandi hefur, í samráði við landeigendur við Seljalandsfoss, lokað gönguleiðinni bak við fossinn eftir að allnokkurt grjóthrun varð úr berginu skammt frá honum og niður undir planið við fossinn.
Steinar sem vega að minnsta kosti 100 kg hver hrundu niður og er það mat þeirra sem til sáu að veruleg hætta hafi skapast af þessu. Gönguleiðin verður lokuð fram yfir helgi.
Í tilkynningu frá lögreglunni á Suðurlandi segir að vísbendingar séu um að mögulega muni hrynja frekar úr berginu þarna á næstunni og það þarf að skoða betur.