Enn koma upp ný tilfelli – Húsum á Úlfljótsvatni lokað

Alls hefur 181 einstaklingur verið fluttur frá Úlfljótsvatni í fjöldahjálparstöðina í Hveragerði. Af þeim hafa 63 verið með einkenni frá meltingarvegi.

Samráðshópur skipaður starfsmönnum Heilbrigðisstofnunar Suðurlands á Selfossi, fulltrúum sóttvarnarlæknis, umdæmislækni sóttvarna í héraði, Rauða kross Íslands, Brunavarna Árnessýslu, bæjarstjóra Hveragerðisbæjar og lögreglu komu saman til fundar um stöðuna kl. 10:00 í morgun í Björgunarmiðstöðinni við Árveg á Selfossi og fór yfir stöðuna.

Í tilkynningu frá lögreglunni segir að enn eru að koma upp tilfelli hjá nýjum einstaklingum og aðrir eru á batavegi og enn aðrir eru orðnir einkennalausir. Engin er, eða hefur verið, alvarlega veikur þannig að til sjúkrahússinnlagnar hafi komið.

Nú er beðið niðurstöðu rannsókna á sýnum sem þegar hafa verið send Landspítala á því um hvers eðlis umrædd veikindi eru. Fyrstu niðurstaðna er að vænta eftir miðjan dag í dag en líklegast er talið að um Noro veiru sé að ræða.

Rauði kross Íslands heldur utan um starfið í fjöldahjálparstöðinni ásamt heilbrigðisstarfsfólki og mun fylgja eftir þeim einstaklingum sem geta farið og eru einkennalausir í samráði við skátahreyfinguna en allt eru þetta skátar á samkomu þeirra og aðstandenda þeirra. Heilbrigðiseftirlit Suðurlands er við störf á Úlfljótsvatni en hluta húsakosts skáta þar hefur verið lokað um sinn.

Viðbragðsaðilar munu funda kl. 16:00 í dag og fara yfir stöðuna ásamt skipulagningu fyrir komandi daga.

TENGDAR FRÉTTIR:
Tugir skáta veiktust á Úlfljótsvatni – Fjöldahjálparstöð opnuð í Hveragerði

Fyrri greinTugir skáta veiktust á Úlfljótsvatni – Fjöldahjálparstöð opnuð í Hveragerði
Næsta greinLögreglan rannsakar tvö hnífstungumál á Flúðum