Tugir skáta veiktust á Úlfljótsvatni - Fjöldahjálparstöð opnuð í Hveragerði

Leturstærð: Decrease font Enlarge font
image Fjöldahjálparstöð hefur verið opnuð í Grunnskólanum í Hveragerði.

Alvarleg veikindi komu upp í Útilífsmiðstöð skáta á Úlfljótsvatni í gær og voru læknir og sjúkraflutningalið frá Heilbrigðisstofnun Suðurlands send á vettvang á til að kanna aðstæður í gærkvöldi.

Á Úlfljótsvatni dvöldu um 175 manns, að mestu leyti börn og ungmenni á aldrinum 10-25 ára, sem eru erlendir gestir hérlendis. Á miðnætti kom í ljós að um ríflega 55 börn í hópnum eru veik að magakveisu.  

Ákveðið var í samráði viðbragðsaðila á Suðurlandi að opna fjöldahjálparstöð vegna sýkingarinnar í grunnskólanum í Hveragerði. 

Viðbragðsstjórn Heilbrigðisstofnunar Suðurlands hefur verið virkjuð, óskað hefur veirð eftir aðstoð björgunarsveita og Rauði kross Íslands hefur opnað fjöldarhjálparstöð í Hvergerði.  

Allir 175 einstaklingarnir sem dvöldu á Úlfljótsvatni hafa verið fluttir til dvalar á fjöldahjálparstöðina meðan verið er að greina eðli og uppruna sýkingarinnar.  Skólahúsnæðinu þar sem hjálpastöðin er staðsett, hefur verið skipt í tvö aðskilin svæði fyrir þá sem eru sýktir og veikir og fyrir þá sem eru ekki veikir eða einkennalausir.  

Hjúkrunarfræðingar og læknar af bráðamóttöku HSU á Selfossi hafa verið kallaðir út og aukið viðbragð er einnig hjá sjúkraflutningamönnum og bráðaliðum HSU á Selfossi. Viðbragðsstjórn sendi vakthafandi lækni og sex heilbrigðisstarfsmenn til að greina og veita hinum veiku meðferð með lyfjum og vökvagjöf í æð. Fjöldi veikra fer vaxandi og er þörf á að kalla út allt tiltækt varalið heilbrigðisstarfsmanna hjá HSU. 

Lagt er allt kapp á að hlúa að öllum sem veikjast og greina alvarleika veikinda til að veita viðeigandi meðferð strax.  Uppruni veikindanna er enn ókunnur en sýni hafa verið tekin og send til rannsóknar.  

Í tilkynningu frá Heilbrigðistofnun Suðurlands segir að allir alvarlega veikir sjúklingar verði fluttir til einangrunar og meðferðar á sjúkrahúsi ef þörf krefur.

  • email Senda frétt
  • print Prentvæn útgáfa
  • Plain text Einfaldur texti