Rannsókn lögreglunnar hefur leitt í ljós að maðurinn sem féll í Gullfoss síðdegis í gær er erlendur hælisleitandi, sem kom til Íslands fyrir nokkru síðan.
Laust fyrir kl 17 í gær fékk lögreglan á Suðurlandi tilkynningu um að maður hefði fallið í fossinn. Leitað var fram til miðnættis í gærkvöld, en leit þá hætt og settir upp sjónpóstar á svæðinu til að fylgjast með ánni í nótt. Uppúr kl 10 í morgun var svo leit haldið áfram og verður henni haldið áfram í dag.
Lögreglan hefur rætt við fjölmarga aðila, bæði sem voru á staðnum og voru nokkrir sjónarvottar sem gátu gefið greinargóða lýsingu á þeim er fór niður fossinn, en hann sást á tveimur stöðum frá útsýnispöllum sem eru við fossinn.
Lögreglan fann svo bifreið á bifreiðastæðinu við Gullfoss í gærkvöld og var hann tekinn til rannsóknar. Rannsókn lögreglunnar hefur leitt í ljós hver maðurinn er.
Ennþá er unnið að rannsókn málsins og eru skýrslutökur í gangi. Samkvæmt upplýsingum frá lögreglunni er ekkert sem bendir til þess að þetta atvik hafi orðið með saknæmum hætti.