Lýðheilsugöngur á Suðurlandi í september

Leturstærð: Decrease font Enlarge font
image Frá undirritun samnings um verkefnið. (F.v.) Sigrún A. Þorsteinsdóttir forvarnarfulltrúi VÍS, Páll Guðmundsson framkvæmdastjóri FÍ, Guðný Helga Herbertsdóttir markaðsstjóri VÍS, Ólafur Örn Haraldsson forseti FÍ og Ólöf Sívertssen verkefnisstjóri hjá FÍ

Ferðafélag Íslands og VÍS hafa skrifað undir samstarfssamning varðandi Lýðheilsugöngur FÍ sem verða á öllu landinu nú í september. Göngurnar eru einn af hápunktunum í glæsilegri afmælisdagskrá FÍ en félagið fagnar 90 ára afmæli á árinu.

Ráðgert er að göngurnar fari fram alla miðvikudaga í septembermánuði kl. 18:00.  Göngurnar verða í nærumhverfi hvers bæjarfélags og verða fjölskylduvænar og taka u.þ.b. 60-90 mín. Til dæmis verða farnar ferðir í nágrenni allra helstu sveitarfélaga og byggðarlaga á Suðurlandi.

Tilgangurinn með verkefninu er sá að hvetja fólk til útivistar og hreyfingar í góðum félagsskap og efla þar með heilsu sína og lífsgæði.

Í fréttatilkynningu segir að VÍS komi myndarlega að verkefninu enda þekkt fyrir áherslu á forvarnir, heilsueflingu og öryggi. Með þessu samstarfi vilja allir hlutaðeigandi leggja sitt af mörkum til að stuðla að bættri lýðheilsu landans þar sem horft er til líkamlegrar, andlegrar og félagslegrar vellíðunar auk öryggis- og umhverfisþátta. Faglegir samstarfsaðilar verða Velferðarráðuneytið og Landlæknisembættið.

Ferðafélag Íslands og VÍS hvetja íbúa sveitarfélaga landsins til þess að taka endilega þátt í þessu skemmtilega og heilsueflandi verkefni, hvort sem um er að ræða skipulagningu á göngum eða almenna þátttöku á göngudögunum.

  • email Senda frétt
  • print Prentvæn útgáfa
  • Plain text Einfaldur texti