Nemendur í Setrinu stunda hestamennsku

Leturstærð: Decrease font Enlarge font
image Krakkarnir hafa fundið sig vel í heimsóknunum í hesthúsið. Ljósmynd/Sunnulækjarskóli

Frá síðustu áramótum hefur nemendum í Setrinu í Sunnulækjarskóla á Selfossi staðið til boða að stunda hestamennsku. Ævintýrið hófst með tilraunaverkefni með einum nemanda.

Í frétt á heimasíðu Sunnulækjarskóla segir að þegar ljóst var hversu jákvæð og uppbyggjandi samvera hestsins og barnsins voru, var ákveðið að bjóða fleirum að taka þátt. Fyrst var byrjað með einn hest í þessu verkefni, Klett, tuttugu vetra gamlan með einstaklega gott geðslag og hefur hann svo sannarlega sýnt hversu mikill klettur hann er fyrir nemendur.

Fljótlega var augljóst að fleiri nemendur þurftu á þessari stund að halda, þar sem farið er út úr skólanum og unnin líkamleg vinna í nánd við dýr og náttúru. Því bættist hún Gola við sem er grjáskjótt átta vetra meri í þetta verkefni. Hún er lítill og nettur ljúflingur sem hefur heillað börnin.

Í kringum hestamennskuna læra nemendur að bera virðingu fyrir sjálfum sér og öðrum. Þau þurfa að temja sér þolinmæði, skipuleg vinnubrögð og yfirvegaða framkomu. Börnin byrja alltaf á því að kemba hestinum vel, gefa þeim brauð eða fóður og leggja síðan á hestinn. Nemendur sem kjósa að skella sér á hestbak fara í nokkra hringi í gerði sem er fyrir utan hesthúsið.

Sumum finnst nóg að fá að koma í hesthúsið, klappa hestunum og finna traust og ró sem streymir frá þeim. Eftir að hafa farið á hestbak er gengið frá og gólfið sópað. Að því loknu er heitt kakó og kex í boði í kaffistofunni sem hressir sál og líkama.

Þetta tilraunaverkefni er orðið mikilvægur þáttur í vikuskipulagi Setursins og höfum við séð hversu jákvæð áhrif þátttakan hefur haft á nemendur. 

  • email Senda frétt
  • print Prentvæn útgáfa
  • Plain text Einfaldur texti