Gunnlaug Hartmannsdóttir í Hróarsholti hefur verið ráðin skólastjóri Flóaskóla frá 1. ágúst næstkomandi. Hún tekur við starfinu af Önnu Gretu Ólafsdóttur sem var sagt upp störfum í vor.
Gunnlaug lauk BA prófi í uppeldisfræði frá Háskóla Íslands árið 1989, diplómanámi á framhaldsstigi í námsráðgjöf árið 2003 og árið 2013 stundaði hún í meistaranám í námsráðgjöf.
Gunnlaug hefur reynslu af kennslu bæði við grunn- og framhaldsskóla auk kennslu í fullorðinsfræðslu. Hún starfaði sem grunnskólakennari við Selásskóla, framhaldsskólakennari við Framhaldsskóla Norðurlands vestra og auk kennslu hefur Hún sinnt námsráðgjöf. Gunnlaug hefur komið að þrónunarstarfi í flestum sínum störfum, þróaði aðstoð og úrræði fyrir lesblinda, verið í leiðandi hlutverki í þróunarstarfi tengdu móðurskólaverkefni í útikennslu og umhverfisvernd, „Grænfánaverkefni“, unnið að námskrárbreytingum auk aðkomu að ýmsum mannauðstengdum ferlum.
Undanfarin 10 ár hefur Gunnlaug verið skólastjóri Tollskóla ríkisins auk þess að hafa starfað sem starfsþróunarstjóri hjá embættinu. Auk þess að annast fræðslumál hjá embættinu hefur Gunnlaug komið að öðrum mannauðsmálum, s.s. ráðgjöf við stjórnendur í erfiðum starfsmannamálum og stefnumótun af ýmsu tagi.
Gunnlaug mun koma að úrvinnslu umsókna um kennarastöður og ráðningu kennara við Flóaskóla fyrir skólaárið 2017 – 2018 en mun síðan taka formlega við starfinu frá og með 1. ágúst.
Alls sóttu fimm um starf skólastjóra en tveir aðilar drógu umsóknir sínar til baka.