Aron Óli Lúðvíksson og Hörður Kristleifsson eru dúxar Fjölbrautaskóla Suðurlands á vorönn 2017. Í dag voru 115 nemendur brautskráðir frá skólanum, þar af voru 81 nemendur sem luku stúdentsprófi.
Flestir stúdentarnir, 47 talsins, luku námi af opinni stúdentsbraut. Af öðrum brautum má nefna að níu nemendur luku prófi af grunnbraut ferða- og matvælagreina og átta luku námi í húsasmíði og tóku þeir sveinspróf um liðna helgi.
Aron Óli Lúðvíksson og Hörður Kristleifsson hlutu viðurkenningar frá Hollvarðasamtökum FSu. Aron Óli hlaut að auki viðurkenningar fyrir framúrskarandi árangur í ensku og stærðfræði.
Guðrún Óskarsdóttir hlaut viðurkenningu fyrir góða ástundun og árangur í stærðfræði. Guðrún hlaut einnig viðurkenningu fyrir framúrskarandi árangur í raungreinum. Gezley Ann Ilustre hlaut viðurkenningu fyrir góðan árangur í tungumálum; spænsku, frönsku, dönsku, ensku og íslensku.
Sigurbjörg Eva Helgadóttir hlaut viðurkenningu fyrir framúrskarandi árangur í sögu og Sigurjón Bergur Eiríksson hlaut viðurkenningar fyrir miklar framfarir í sögu og frábæran árangur og þrautseigju á Starfsbraut. Sigurjón Bergur fékk einnig viðurkenningu fyrir mikinn áhuga, vinnusemi og jákvæðni sem skilaði sér með góðum árangri og mikilli framför í myndlist.
Katla Björg Ómarsdóttir hlaut viðurkenningu fyrir góðan árangur og vinnusemi í íþróttum og íþróttafræði. Írena Birta Gísladóttir hlaut viðurkenningu fyrir fyrirmyndarþátttöku í handverki og hönnun og Aðalsteinn Sakarías Jóhannsson hlaut viðurkenningu fyrir hugmyndaauðgi, skopskyn og vinnusemi í myndlist.
Bjarni Friðrik Ófeigsson hlaut viðurkenningu fyrir mjög góðan árangur í rafmagnsgreinum. Kristbjörg Harpa Thomsen hlaut viðurkenningu fyrir ágæta frammistöðu og áhuga í matvælagreinum. Auður Erla Gunnlaugsdóttir og Móeiður Sigrún Guðlaugsdóttir hlutu viðurkenningar fyrir frábæran árangur og góða ástundun í hárgreiðlsu á Starfsbraut.
Þorkell Ingi Sigurðsson, Sesselja Dan Róbertsdóttir og Sveinn Ægir Birgisson hlutu viðurkenningar fyrir vel unnin störf að félagsmálum.
Einnig voru þau Jóna Ingvarsdóttir og Hannes Stefánsson, kennarar við skólann heiðraðir og þeim færður þakklætisvottur frá skólanum.