Ráðherra vígði nýja hamborgara-samstæðu

Þorgerður Katrín Gunnarsdóttir, sjávarútvegs- og landbúnaðarráðherra, heimsótti kjötvinnslu Sláturfélags Suðurlands á Hvolsvelli í vikunni og kynnti sér viðamikla starfsemi SS.

Við kjötiðnað SS eru unnin um 170 ársverk sem hafa mikla þýðingu fyrir Rangárvallasýslu. Starfsemi SS á Hvolsvelli auk sláturstöðvar SS á Selfossi og starfsemi dótturfélags SS, Reykjagarðs hf, víða um Suðurland, gerir SS að stærsta atvinnuveitanda Suðurlands.

Við þetta tækifæri vígði Þorgerður nýja vélarsamstæðu SS, sem er bylting í framleiðslu á hamborgurum. Í eldri búnaði voru hamborgarar mótaðir við mikinn þrýsting en nýja aðferðin lausmótar hamborgara þar sem allir vöðvaþræðir liggja lóðrétt í hverjum hamborgara. Lausmótaðir hamborgarar eru fljótari í steikingu og steikjast jafnar sem skilar neytendum safaríkari og betri vöru.

SS hefur hafið dreifingu á þessari vöru undir nafninu „Hammari“ og notar eingöngu íslenskt kjöt við framleiðsluna.

Fyrri greinKvenfélag Hvammshrepps gefur til HSU í Vík
Næsta greinÁrborgarar hvattir til að huga vel að heilsunni