Á landsþingi Slysavarnafélagins Landsbjargar sem fór fram á Akureyri um helgina var kjörin ný stjórn félagsins. Sunnlendingar eiga tvo fulltrúa í stjórninni.
Sjálfkjörinn formaður var Smári Sigurðsson sem gegnt hefur formennskunni síðustu tvö ár. Tveir Sunnlendingar voru kosnir áfram í stjórn, Guðjón Guðmundsson, Björgunarsveitinni Björg á Eyrarbakka og Gísli V. Sigurðsson, Björgunarsveitinni Stjörnunni í Skaftártungu. Aðrir stjórnarmenn eru Þór Þorsteinsson, Hallgrímur Óli Guðmundsson, Auður Yngvadóttir, Otti Rafn Sigmarsson, Valur S. Valgeirsson og Svanfríður Anna Lárusdóttir. Stjórn félagsins er kjörin til tveggja ára af fulltrúum björgunarsveita og slysavarnadeilda af öll landinu.
Forseti Íslands Hr. Guðni Th. Jóhannesson heimsótti óvænt þingið og ávarpaði gesti. Ræddi hann um mikilvægi sjálfboðaliða Slysavarnafélagsins Landsbjargar í störfum sínum og kraftinn þegar til þeirra væri leitað.
Alls eru um sex hundruð félagar Slysavarnafélagsins Landsbjargar staddir á Akureyri um helgina en auk hefðbundinna þingstarfa fara fram björgunarleikar félagsins þar sem att er kappi í gamni og alvöru í ýmsum björgunarstörfum. Má nefna fjallabjörgun, skyndihjálp og að bakka á gömlum traktor með kerru í eftirdragi.