Laugardaginn 13. maí hefst nýr kafli hjá fjölskyldu- og ferðaþjónustufyrirtækinu Midgard á Hvolsvelli sem hefur rekið ferðaskrifstofuna Midgard Adventure frá árinu 2010.
Í nýjustu viðbótinni, Midgard Base Camp, er að finna gistimöguleika sem falla bæði undir hostel og hótel flokkanir þar sem tæp 50 rúm eru í boði bæði í hótelherbergjum og kojugistingu. Mikið hefur verið lagt í smíði á innanstokksmunum þar sem áhersla er lögð á þægindi í heimasmíðuðum uppábúnum lokrekkjum með myrkvunargluggatjöldum, rafmagni og góðum dýnum.
Hótelherbergin hafa upp á allt að bjóða fyrir þá kröfuharðari sem vilja dvelja út af fyrir sig. Snyrtileg baðherbergi, góð rúm og einstakt útsýni er meðal þess sem þessir gestir fá að njóta. Svo ekki sé talað um heitan pott og gufubað sem staðsett er á þaki Midgard Base Camp með útsýni yfir Þórsmörk og Eyjafjallajökul. Þetta svæði er aðgengilegt fyrir alla þá sem gista í húsinu.
Verið er að þróa matseðla og vinna að því að opna 75 sæta veitingastað í húsinu þar sem áhersla verður lögð á heiðarlega matargerð í hollari kantinum á góðu verði. Stefnt er að því að veitingastaðurinn opni um mánaðarmótin maí/júní með fullbúnum matseðli. Veitingasalirnir eru þó tilbúnir og er leyfi fyrir 150 manns sem er tilvalið fyrir hverslags viðburði.
Í dag er boðið upp á morgunverðar- og hádegishlaðborð og eru allir velkomnir. Morgunverðarhlaðborðið er klárt frá 7:00 á morgnana og er barinn opinn til 23:00 á kvöldin alla daga. Í Midgard Base Camp er einnig að finna verslun og leigu á útivistarfatnaði og búnaði til fjallaferða í samstarfi við 66°Norður og Fjallakofann. Verslunin er öllum opin, hlaðin gæða útbúnaði til fjallaferða og útivistar og úrvalið eftir árstíðum.
Mikið verður lagt upp úr góðri upplýsingagjöf til ferðamanna og er öllum velkomið að kíkja við í gott kaffi, kökusneið og fá ráðgjöf fyrir ferðalagið og upplýsingar um nátturuna á svæðinu eða einfaldlega skella sér í ferð með Midgard Adventure.
Í fréttatilkynningu segir að Midgard Base Camp sé staður til þess að heimsækja á ferðalaginu um náttúruperlur Suðurlands. Þar er vettvangur til þess að deila sögum yfir köldum eða heitum drykk, hlaða rafhlöðurnar, hlusta á sögur annarra og kynnast þeim sem sækja Ísland heim allt árið.
Opnunarpartý verður laugardaginn 13. maí næstkomandi frá 16:00 til 18:00 þar sem boðið verður upp á léttar veitingar og kynningu á húsinu og starfseminni. Eftir kl. 18:00 verður svo blásið í Eurovisionpartý, „happy hour“ og lifandi tónlist fram á kvöld.