Kvartett Kristjönu Stefáns var í kvöld veitt Menningarviðurkenning Árborgar 2017 í Tryggvaskála á Selfossi af íþrótta- og menningarnefnd sveitarfélagsins, á menningar og listahátíðinni Vori í Árborg.
Það voru Ásta Stefánsdóttir, framkvæmdastjóri Árborgar og Kjartan Björnsson, forseti bæjarstjórnar og formaður íþrótta- og menningarnefndar Árborgar, sem afhentu viðurkenninguna.
Kvartett Kristjörnu Stefánsdóttur skipa auk hennar, Gunnar Jónsson trommur, Smári Kristjánsson kontrabassi og Vignir Þór Stefánsson píanó.
Þessir fjórir einstaklingar hafa mikið lagt af mörkum til tónlistarmenningar í sveitarfélaginu á liðnum áratugum í hljómsveitum og tónlistarhópum. Kvartett Kristjönu hefur verið starfandi í 25 ár og hefur verið fastur punktur í aðdraganda jóla með árlegum jólatónleikum og hefur kvartettinn gefið út einn geisladisk.