Sveitarfélagið Ölfus festi í dag kaup á sínum fyrsta rafbíl. Um er að ræða bifreið af gerðinni Kia Soul sem notuð verður við heimaþjónustu fyrir aldraða í sveitarfélaginu.
Drægni bifreiðarinnar á fullri hleðslu er tæplega 200 km. Kaupin eru hluti af umhverfisstefnu sveitarfélagins að nýta umhverfisvænni kosti eins og mögulegt er í rekstri sínum.
Ekki er vafi á því að þessi nýja bifreið mun nýtast vel í framtíðinni í þjónustu við elstu íbúa sveitarfélagsins og fer vel á því að fyrsta skrefið í rafbílvæðingu þess sé nýtt í þeirra þágu.
Fyrir skömmu var einnig sett upp hleðslustöð fyrir rafbíla við íþróttamiðstöðina í Þorlákshöfn og þar geta bæjarbúar og gestir íþróttamiðstöðvarinnar nú hlaðið bílinn sinn án endurgjalds. Von er á fleiri hleðslustöðvum í Þorlákshöfn á næstu misserum.