Vörslusviptingu nautgripa aflétt

Matvælastofnun hefur aflétt vörslusviptingu á nautgripabúi á Suðurlandi, en gripið var til hennar vegna vanfóðrunar dýra og aðbúnaðar þeirra.

RÚV greinir frá þessu.

Um mánaðamótin janúar-febrúar var ástandið metið sem svo að aðgerðir þoldu ekki bið, en áður hafði ítrekað verið reynt að ná fram úrbótum. Átta gripum var slátrað en að sögn Gunnars Þorkelssonar, héraðsdýralæknis, var það gert til að búa til pláss fyrir önnur dýr. Þeir gripir sem sendir voru í slátrun voru sumir vannærðir eða með júgurbólgur, og þá var kálffullum gripum ekki slátrað.

Samkvæmt upplýsingum frá Matvælastofnun hefur málið verið til lykta leitt með farsælum hætti, en bóndinn mun hafa brugðist við með fullnægjandi hætti að mati stofnunarinnar. Ekki fæst uppgefið um hvaða bæ ræðir.

Gunnar segir að þó aðgerðum MAST sé lokið á bænum í bili verði áfram grannt fylgst með þróun mála.

Frétt RÚV

Fyrri greinTvisturinn með tvenn verðlaun
Næsta greinBæjarmál í opnu húsi