Landstólpi ehf. í Skeiða- og Gnúpverjahreppi hefur fengið einkaleyfi á Íslandi til að selja Fullwood M2erlin mjaltaþjóna og veita notendum þeirra tilheyrandi þjónustu.
Þetta gerist samkvæmt nýjum umboðssamningi við breska stórfyrirtækið Fullwood. Breska fyrirtækið er leiðandi í hönnun og framleiðslu mjaltakerfa og mjaltabúnaðar, hefur starfað í meira en sjö áratugi og skiptir við bændur í yfir 80 ríkjum um víða veröld.
„Samningurinn við Fullwood markar tímamót hjá Landstólpa og raunar íslenskum kúabúskap yfirleitt, enda er breska fyrirtækið í fremstu röð í heiminum á sínu sviði. Aðdragandinn er vinna og viðræður undanfarin tvö ár en nú er samkomulagið í höfn eftir vandaðan undirbúning,“ segir Arnar Bjarki Eiríksson, framkvæmdastjóri Landstólpa.
Í tilkynningu frá Landstólpa segir að með samningnum sé tekið stórt skref í starfsemi fyrirtækisins með því að geta nú boðið heimsþekkt og rótgróið vörumerki. „Það einfaldar skipulag, samskipti og framkvæmdir að eiga við einn aðila í stað margra, slík hagræðing jafngildir sparnaði og þar getur munað miklu í krónum talið,“ segir Arnar Bjarki.
Hann segir Landstólpa kappkosta að bjóða viðskiptavinum einungis það besta og Fullwood mjaltaþjónar standi sannarlega undir því.
Það var David O‘Hare, viðskiptaþróunarstjóri hjá Fullwood sem kom til Íslands á dögunum og gekk frá umboðssamningnum. Hann segist bera miklar væntingar til samstarfsins við Landstólpa. „Starfsemi Landstólpa er afar fagmannleg og staða fyrirtækisins sterk á íslenska markaðnum,“ segir hann.