Tvær fjölskyldur komnar og von á einni í viðbót

Tvær fjölskyldur úr hópi flóttafólks frá Sýrlandi komu til Íslands á mánudagskvöld. Fólkið sest að í Hveragerði og Árborg og var haldið með það þangað eftir stutta móttökuathöfn við komuna í Leifsstöð.

Í Leifsstöð buðu félags- og jafnréttismálaráðherra, forsvarsmenn sveitarfélaganna og Rauða krossins fólkið velkomið.

„Ég býð ykkur innilega velkomin eftir langa og stranga ferð. Ísland er friðsælt land, hér ríkir lýðræði og hér getið þið verið viss um að mannréttindi ykkar séu varin og virt“ sagði Þorsteinn Víglundsson, félags- og jafnréttismálaráðherra, í stuttu ávarpi við komu fólksins í Leifsstöð.

Fjölskyldurnar tvær hafa í um þrjú ár hafst við í flóttamannabúðum í Líbanon við erfiðar aðstæður. Nú tekur við nýtt líf hjá þeim, en þetta eru tvenn hjón, hvor um sig með fimm börn á aldrinum 6–19 ára sem munu eins fljótt og aðstæður þeirra leyfa hefja nám á viðeigandi skólastigum.

Þetta er í fyrsta sinn sem Hveragerðisbær og Sveitarfélagið Árborg taka á móti flóttafólki. Auk fjölskyldnanna tveggja sem komu í gær er von á þriðju fjölskyldunni í lok þessa mánaðar. Samtals eru þetta 21 einstaklingur.

Gerður hefur verið samningur milli velferðarráðuneytisins og sveitarfélaganna um móttökuverkefnið sem lýtur að aðstoð og stuðningi við fólkið á næstu tveimur árum. Þorsteinn Víglundsson, félags- og jafnréttismálaráðherra, Aldís Hafsteinsdóttir, bæjarstjóri Hveragerðis, og Ásta Stefánsdóttir, framkvæmdastjóri Árborgar, undirrituðu samningana í Leifsstöð á mánudag. Þorsteinn þakkaði sveitarfélögunum fyrir gott samstarf í tengslum við þetta mikilvæga verkefni og einnig Rauða krossi Íslands sem gegnir stóru hlutverki við móttöku flóttafólks sem hingað kemur.

Í viðmiðunarreglum um móttöku og aðstoð við flóttafólk er fjallað um inntak þeirrar aðstoðar sem flóttafólk skal njóta fyrst eftir komu sína til landsins og gerð grein fyrir kostnaðarskiptingu vegna þess milli ríkis og viðkomandi sveitarfélaga. Í grófum dráttum snúa þessi verkefni að því að tryggja fólki húsnæði, félagslega ráðgjöf, menntun og fræðslu, heilbrigðisþjónustu, aðstoð við atvinnuleit og fjárhagsaðstoð til framfærslu.

Rauði krossinn kemur að móttöku flóttafólksins í hverju sveitarfélagi þar sem hann útvegar fólkinu nauðsynlegt innbú á heimili þeirra og hefur jafnframt umsjón með stuðningsfjölskyldum sem ætlað er að liðsinna flóttafólkinu við aðlögun að íslensku samfélagi.

Fyrri greinSkjálfti að stærðinni 4,3 í Kötluöskjunni
Næsta greinFSu tapaði mikilvægum stigum