„Virðingarleysið við heimilisfólkið er takmarkalaust“

Stjórn stéttarfélagsins Bárunnar harmar þá stöðu sem komin er upp varðandi dvalar- og hjúkrunarheimilið á Kumbaravogi.

Eins og fram hefur komið í fréttum verður Kumbaravogi lokað fyrir 1. mars næstkomandi.

Í ályktun frá stjórn Bárunnar segir að virðingarleysið við heimilisfólkið á Kumbaravogi sé er takmarkalaust og er það flutt án nokkurs fyrirvara til dvalar á öðrum stöðum.

„Í ljósi stöðunnar hlýtur að vera forgangsverkefni að flýta nýrri byggingu hjúkrunarheimilis í Árborg og skorar stjórn félagsins á stjórnvöld að öryggi þeirra sem þurfa á þessari þjónustu að halda verði tryggt svo sómi verði að,“ segir meðal annars í ályktuninni.

Stjórn Bárunnar segir að það sé einnig alvarlegt þegar einn af stærri vinnustöðum í sveitarfélaginu lokar og 50 manns missa vinnuna í einu vetfangi.

„Það eru 50 störf sem tapast í umönnun aldraðra, meirhlutinn konur. Mikil óvissa ríkir um starfslok þeirra starfsmanna sem starfa á Kumbaravogi. Stjórn Bárunnar, stéttarfélags hvetur viðkomandi aðila sem bera ábyrgð á starfslokum og velferð starfsmanna að þeim verði sómi sýndur og farið eftir þeim reglum sem gilda á vinnumarkaði,“ segir ennfremur í ályktuninni, og í niðurlagi hennar eru yfirvöld í Árborg hvött til að leita allra leiða til þess að tryggja ný störf í sveitarfélaginu í stað þeirra sem þarna hafa tapast.

Fyrri greinTökulið Game of Thrones sótti ekki um leyfi
Næsta greinFlestar lykiltölur GÞ jákvæðar