Verið er að hleypa af stokkunum spennandi verkefni í Rangárþingi eystra sem kallast „Heilsuefling fyrir eldri aldurshópa 60+“.
Það eru þær Aníta Þorgerður Tryggvadóttir og Ingibjörg Steinunn Sæmundsdóttir sem standa að verkefninu en þær stunda meistaranám á sviði íþróttakennslu og íþróttafræða við Menntavísindasvið Háskóla Íslands. Dr. Janus Guðlaugsson, lektor, er leiðbeinandi og umsjónarmaður verkefnisins.
Þær stöllur fengu í gær styrk fyrir verkefnið frá Vísinda- og rannsóknarsjóð Suðurlands. Forseti Íslands, Guðni Th. Jóhannesson, afhenti styrkinn við hátíðlega athöfn í Fjölbrautaskóla Suðurlands.
Sveitarfélagið Rangárþing eystra tekur þátt í þessu verkefni, meðal annars með nýtingu á Íþróttamiðstöðinni á Hvolsvelli og með ýmsum öðrum hætti. Enginn þátttökukostnaður er hjá íbúum sveitarfélagsins sem eru fæddir 1957 og fyrr, nema íþróttafatnaður og hugsanlega púlsúr ef fólk vill fylgjast með hjartslætti meðan á íþróttaiðkun stendur. Lögð er áhersla á þol- og styrktarþjálfun samhliða liðkandi æfingum og ráðgjöf um næringu.
Að sögn Anítu og Ingibjargar er viðfangsefni verkefnisins forvarnarstarf og heilsuefling á sviði líkams- og heilsuræktar. Markmiðið er að bæta afkastagetu hinna eldri, auka þol þeirra og styrk og auka hreyfifærni með markvissri þjálfun. Markmiðið er að kanna líkamsástand þátttakenda í upphafi verkefnisins og að 12 vikna þjálfun lokinni. Stefnt er að því að þátttakendur verði almennt hraustari, bæði andlega og líkamlega og takist lengur á við athafnir daglegs lífs og geti að öllum líkindum búið lengur í sjálfstæðri búsetu.
Ísólfur Gylfi Pálmason, sveitarstjóri, hvetur alla íbúa sem áhuga og tök hafa á að nýta sér þetta spennandi tækifæri. Rangárþing eystra er fyrsta sveitarfélagið á landinu til þess að taka þátt í verkefni sem þessu. „Ef vel gengur heldur verkefnið væntanlega áfram. Við höfum byggt upp mjög góða aðstöðu til líkamsræktar og ég hvet íbúa, unga og aldna til þess að nýta hana sem mest. Máltækið „heilbrigð sál í hraustum líkama“ á svo sannarlega enn við,“ segir Ísólfur.
Verkefnið verður kynnt nánar með dreifibréfi í sveitarfélaginu auk þess sem kynningarfundur verður í Hvolnum, Hvolsvelli kl. 20:00, mánudaginn 16. Janúar. Fundurinn er opinn öllum en íbúar fæddir 1957 og fyrr eru sérstaklega hvattir til að mæta.