Björgunarsveitarmenn í Vík í Mýrdal aðstoðuðu ökumenn þrjátíu til fjörtíu bíla sem festust í ófærð á Reynisfjalli í morgun. Mikill meirihluti voru illa búnir erlendir ferðamenn.
Hvassviðri hefur verið á sunnan- og suðvestanverðu landinu og það sló í storm við Mýrdalsjökul.
„Við byrjuðum upp úr átta í morgun, þá vorum við kallaðir út. Þá var okkur sagt að það væru sex bílar fastir en það nú fljótt að fjölga í hópnum. Við erum búnir að aðstoða á milli þrjátíu og fjörtíu bíla á Reynisfjalli í morgun,“ sagði Orri Örvarsson, formaður Víkverja í samtali við Ríkisútvarpið.
Orri segir að stór kafli fjallsins sé þungfær en veðrið hafi verið ágætt, í það minnsta ekki blint. Hann segir að flestir ökumanna séu illa búnir ferðamenn. „Þetta eru 95 prósent ferðamenn, […] bara í lakkskónum sínum og svoleiðis, fólk er greinilega ekki að fara í einhvern vetur. Þetta verður strembinn dagur ef spáin rætist. Það gæti farið að hvessa þegar líður á og þá verður fjallið bara algjörlega ófært.“
Útlit er fyrir snjókomu eða éljagang á öllu landinu í dag. Lélegt skyggni sökum skafrennings og ofankomu er líklegt á vel flestum fjallvegum.
Það er hálka eða snjóþekja víða á vegum á Suðurlandi og þungfært er á nokkrum vegum í uppsveitum og útvegum. Þæfingsfærð og éljagangur er með suðausturströndinni.