Lögreglan á Suðurlandi kærði ökumann í liðinni viku fyrir að aka með 11 ára barn í skotti skutbifreiðar sinnar.
Skammt er síðan farþegi sem fluttur var með sama hætti kastaðist út úr bifreið og lést þegar bifreiðin valt á Biskupstungnabraut. Ökumaður þeirrar bifreiðar fékk nýverið dóm fyrir manndráp af gáleysi.
Annars hafði lögreglan í nógu að snúast í síðustu viku og meðal annars voru 103 ökumenn kærðir fyrir að aka of hratt.
Einn þeirra reyndist jafnframt vera sviptur ökurétti. Flestir voru stöðvaðir á þjóðvegi 1 í Skaftafellssýslunum. Um 60 % þeirra sem aka of hratt eru erlendir ferðamenn á bílaleigubílum. Hraði þeirra er líka að jafnaði meiri en íslenskra ökumanna sem lenda í hraðamælunum því meðal sekt erlendu ökumannanna þessa viku er um 43 þúsund krónur en þeirra íslensku um 39 þúsund krónur.
Lögreglan ítrekar að hraðakstur er ein algengasta orsök alvarlegra slysa í umferðinni.
Einn ökumaður var kærður fyrir að aka ölvaður í liðinni viku og fjórir fyrir að aka undir áhrifum fíkniefna.