Hvergerðingum fjölgar vel umfram landsmeðaltal

Aldursgreind íbúaþróun í Hveragerði milli áranna 1998 til ársins 2015 var kynnt á fundi bæjarráðs þann 1. apríl síðastliðinn.

Íbúar Hveragerðis voru á árinu 1998 alls 1.668 talsins en eru nú 2.384. Fjölgun á þessum 17 árum er því 716 einstaklingar eða 42,9%.

Á sama tímabili fjölgaði landsmönnum um 20,8% þannig að ljóst er að fjölgun í Hveragerði hefur verið langt umfram landsmeðaltal á síðastliðnum misserum. Slíkt var einnig reyndin á árinu 2014 þegar íbúum fjölgaði um 2,2%.

Í frétt á heimasíðu Hveragerðis segir að það sé ánægjulegt að sífellt fleiri skuli velja Hveragerði til búsetu og ekki sé útlit fyrir annað en að fjölgunin haldi áfram á næstunni.

Fyrri greinSæmundur gefur út „Fardaga“ Ara Trausta
Næsta greinStjórnendadagur í fyrsta sinn á HSu