Kindahræ á víðavangi í Ölfusinu

Bæjarstarfsmenn í Ölfusi fengu ábendingu um það að einhver hefði hent kindahræjum á víðavangi upp með Gamla vegi fyrir utan þéttbýlið í Þorlákshöfn.

Sigurður Ósmann Jónsson, skipulags- og byggingarfulltrúi, í Ölfusi segir að það eigi að vera létt fyrir þann sem þarf að losa sig við hræ að farga þeim á réttum stað í stað þess að henda þeim á víðavangi.

Hann segir að svona nokkuð hafi gerst áður í Ölfusinu en þá hafi verið hent beinum af stærri gripum við veginn út á bjarg.

Sigurður skorar á íbúa Ölfuss að ganga vel um og koma sorpi á rétta staði til förgunar. Gámasvæðið í Ölfusi er opið frá kl. 13-18 virka daga og frá kl. 13-16 á laugardögum.

Fyrri greinMetmæting á upplestrarkvöld
Næsta greinJana Lind yngsti sigurvegari kvennaglímunnar