SAF fagna lögbannsúrskurði

Samtök ferðaþjónustunnar (SAF) fagna niðurstöðu Héraðsdóms Suðurlands frá því í gær þess efnis að sýslumanninum á Selfossi beri að framfylgja lögbannskröfu fjármálaráðuneytisins á ólöglega gjaldtöku Landeigendafélags Geysis við náttúruperlurnar í Haukadal.

SAF taka undir kröfur Landeigendafélags Geysis um að ekki sé hægt að bíða lengur með uppbyggingu á svæðinu, enda séu hverirnir við Geysi í Haukadal einir af helstu hornsteinum íslenskrar ferðaþjónustu. Á fjölmennum aðalfundi samtakanna á dögunum tilkynnti iðnaðar- og viðskiptaráðherra að nú þegar ætti að setja fjármuni til uppbyggingar á þeim ferðamannastöðum þar sem þörfin er mest.

Í tilkynningu frá SAF segir að samtökin hafi ávallt lagt mikla áherslu á að horft sé til heildstæðra lausna hvað varðar gjaldtöku til uppbyggingar á fjölsóttum ferðamannastöðum, fremur en staðbundinna. Þannig séu heildarhagsmunir stærstu og mest vaxandi atvinnugreinar landsins best tryggðir.

Fyrri greinAndrés leiðir Vinstri græna í Árborg
Næsta greinUmf. Selfoss áfram með Selfossvöll